ភ្នំពេញ៖ រដ្ឋាភិបាលប្រទេសចិន បានផ្ដល់ជំនួយឥតសំណងជាង ២៧០លានដុល្លា ដល់កម្ពុជាសម្រាប់យកទៅអភិវឌ្ឍន៍ជាតិ។

រដ្ឋមន្ត្រីការបរទេសកម្ពុជាលោក ប្រាក់ សុខុន បានឱ្យដឹងក្នុងសន្នីសិទសារព័ត៌មាននៅរសៀលនេះថា ភាគីចិនបានសម្រេចផ្ដល់ជំនួយឥតសំណងជាង ២៧០លានដុល្លា សម្រាប់ជួយដល់ការអភិវឌ្ឍកម្ពុជាលើវិស័យអទិភាពផ្សេងៗ។

ការសម្រេចផ្ដល់ជំនួយនេះគឺបន្ទាប់ពីមានកិច្ចប្រជុំមួយរវាងរដ្ឋមន្ត្រីការបរទេសកម្ពុជាលោក ប្រាក់ សុខុន និងរដ្ឋមន្ត្រីការបរទេសចិន លោក វ៉ាង យី នៅទីស្ដីការក្រសួងការបរទេសនារសៀលនេះ។

លោកក៏បានឆ្លើយតប ចំពោះការបារម្ភថាកម្ពុជាអាចនឹងធ្លាក់ក្នុងអន្ទាក់បំណុលចិន ថាមិនមែនជារឿងដែលគួរឱ្យបារម្ភនោះទេ ដោយសារទំនាក់ទំនងកម្ពុជា ចិន ជាទំនាក់ទំនងដែលផ្អែកលើការគោរព និងភាពស្មោះត្រង់រវាងគ្នានឹងគ្នា ហើយថាស្ថានភាពកម្ចីរបស់ប្រទេសកម្ពុជានៅតែអាចគ្រប់គ្រងបាន។

លោកថា៖ « បំណុលជាតិអាចមានហានិភ័យនៅពេលវាកើនឡើងលើសពី៤០ភាគរយ ចំពោះបំណុលកម្ពុជាបច្ចុប្បន្នមិនដល់៣០ភាគរយទេ! […] យើងចេះប្រើប្រាស់កម្ចីរបស់យើងបានសមរម្យ » ។

គិតត្រឹមឆមាសទី១ ក្នុងឆ្នាំ២០២១ កម្ពុជាជំពាក់បំណុលបរទេសប្រមាណ ៩ពាន់លានដុល្លារ ក្នុងនោះជំពាក់ប្រទេសចិនជិត៤ពាន់លានដុល្លា ដែលស្មើនឹង ៤៣,០៧% នៃប្រាក់ជំពាក់សរុប។

រដ្ឋមន្ត្រីការបរទេសចិន លោក វ៉ាង យី បានមកដល់កម្ពុជាកាលពីព្រឹកនេះ ក្នុងដំណើរទស្សនកិច្ចផ្លូវការរយៈពេល២ថ្ងៃ ដើម្បីបង្កើនចំណងទំនាក់ទំនងប្រទេសកម្ពុជា ចិនបន្ថែមទៀត។

ក្នុងដំណើរទស្សនកិច្ចផ្លូវរដ្ឋនៅកម្ពុជានេះ លោក វ៉ាង យី នឹងអញ្ចើញចូលរួមក្នុងពិធីប្រគល់ និងទទួលពហុកីឡាដ្ឋានមរតកតេជោ ជាមួយនាយករដ្ឋមន្ត្រីកម្ពុជា សម្ដេចតេជោ ហ៊ុន សែន និងអញ្ជើញធ្វើជាសាក្សី និងអធិបតីក្នុងពិធីចុះហត្ថលេខាលើឯកសារទ្វេភាគីដ៏សំខាន់មួយចំនួនផងដែរ៕